5.16五區公投日越嚟越近，唔少市民近排見到公民黨傑哥現身酒樓，但就唔見佢食嘢，原來傑哥為同街坊推廣五區公投，近日經常到酒樓搭枱，唔少茶客好受落，同佢飲啖茶，傾兩句。
傑哥至今就已去過逾10間酒樓，除咗「洗」酒樓，傑哥連行人隧道、商場門口都唔放過，總之見到街坊，都會派發《公投報》。
傑哥又同黨友陳淑莊喺大牌檔拍咗兩條「五區公投Q&A」短片放上YouTube，向唔明白五區公投嘅市民詳細講解，甚至連娛樂節目都唔放過，去有線娛樂台節目《精算俏佳人》做嘉賓，跟青姐同幾個靚女一齊主持節目，講吓男老闆定女上司難服侍。