【志雲難局之人情冷暖】陳志雲涉貪污被捕，其愛將們態度迥異，張敬軒昨日坦言擔心志雲，還指陳是其良師益友，在無綫工作不斷的藍奕邦則表示與志雲毫不相熟，見面也只是打個招呼。
陳志雲力捧過不少愛將，幫助過很多歌手，但他涉貪被捕後，有人不離不棄，也有人劃清界線。愛將之一張敬軒昨日到商台接受訪問，談到志雲事件時說：「呢件事上唔方便講太多，希望佢冇事，佢係我一位好尊重嘅前輩，都有提點過我。」有傳案件涉及歌手在大騷中的酬勞被抽水，軒仔說：「出騷錢一直都係公司傾，我都唔知有幾多錢，每個月只係睇大數出糧。」他坦言認識志雲的私人助手叢培崑，還大讚叢上進勤力。
軒仔坦承07年演唱會的產品是交給叢培崑的公司製作，問他可知陳志雲有否投資？軒仔表示不知情，他說：「喺朋友角度，我覺得佢哋兩個都係好真誠嘅朋友，家發生呢啲事都覺得好遺憾。」對於被指是「迷雲黨」之一，軒仔說：「我唔評論呢個term，總之陳生係我良師益友。」
邦邦：識做就紅咗
藍奕邦也曾被指是陳志雲愛將之一，昨日傍晚他到中環出席活動，竟表示與陳志雲不相熟，藍奕邦說：「我同其他歌手一樣，工作由公司接洽，同陳生頂多係打個招呼，唔係話熟囉。」他又謂不曾與錢國偉合作，因他不上綜藝節目，他說：「我唔comment太多，自己做自己嘢。」藍奕邦表示不懂得過時過節送禮，因他不擅長交際，他說：「我識做就紅咗啦，我自己同公司高層見到面都語塞o架，如果送太多嘢俾人知道，感覺咪仲差。」
曹格早前在澳門舉行的演唱會，叢培崑的公司也有份搞製作，昨晚曹格到灣仔出席活動時說：「我只知我嘅演唱會主辦單位係威尼斯人（酒店），而製作同宣傳就交畀佢哋間公司做。我識佢助手（叢培崑），唔係陳生介紹，佢助手都係我台灣朋友介紹我識，識咗兩年。」曹格表示只有澳門的演唱會跟他們合作。
曹格讚志雲好人
曹格又直言曾和叢培崑食飯，有被問及有否興趣開演唱會，但之後未有詳談。至於當日演唱會有否收少酬勞？曹格堅稱：「同其他地方一樣同一歌酬，佢哋做生意，我肯我嘅公司都唔肯。」他表示陳志雲是經叢培崑認識，他不知對方旗下有其他公司，印象中覺陳志雲是好人，當日他醉酒打架，陳志雲也有SMS問候，又送不少禮物給曹格囝囝。而上星期剛接受陳志雲訪問的羅傑承亦表示不知對方有其他公司，彼此甚少單獨見面。
採訪：胡比、李珮洳、楊潔雯
攝影：胡比、陳俊強、陳順禎
《全城熱話》
無綫總經理陳志雲及監製錢國偉等人因涉及貪污被捕，引起軒然大波，由於兩人在圈中人緣甚廣，故此台前幕後對他們被捕一事皆議論紛紛。
杜汶澤：陳生引人注意
我知道呢件事都覺得好震驚，我同錢國偉對上一次合作，係英皇十周年澳門嗰個騷，佢係做監製，當時見到佢都有講有笑。我估呢件事唔會對電視台有影響，一個人本身有麻煩事未必會影響個台，而且觀眾睇電視都係尋求娛樂。可能好多人都以為陳生係藝人，因為佢都有做節目，佢作為一個總經理，比其他傳媒嘅總經理多人認識，所以注意力都多啲。
何定鈞（無綫前總經理）：人在江湖身不由己
我印象中陳志雲係好好先生，希望佢可以處之泰然，當日我做總經理時，有時人在江湖身不由己，所以做嘢一定要頭腦清晰。
何韻詩：我攬住佢喊
我之前有一次去飲嘢，飲醉咗，陳生喺我附近，我仲攬住佢喊。我同陳生係認識，唔算太熟。作為圈中人我都會留意呢件事，但噚日有朋友SMS話我知，我都愕咗然，但家唔好妄下判斷。
黃長發：會支持佢哋
選香港先生時係錢國偉睇住我哋，當時陳志雲都有嚟探班，不過我哋唔熟，望佢哋可以面對呢件事，唔好傷心，總之有難過嘅時候，我都支持佢哋度過。
呂慧儀：我無黨無派
我又唔識寧進，同陳生又唔熟，我冇話係邊一黨邊一派，最多接觸都係錢國偉，因為佢係監製，但私底下唔會出去一齊玩。簽約時公司都有好多指引，當中包括有保險、防貪指引都有，我自己都有睇。
