陳自瑤（YoYo）與男友王浩信感情穩定，有愛情滋潤的她，不忘為家中心肝椗西摩犬Anna覓伴侶，為抱孫升呢做「外婆」預早作準備。YoYo表示將嚴選靚品種的純種女婿，混種狗免問。 撰文：比華利
不少靚女除愛大隻佬，還鍾情大隻狗，陳自瑤在現實生活中兩者俱備，男友王浩信夠高大，7個月大的愛犬Anna，亦絕不的骰，拖着愛犬上街，令纖瘦的YoYo更顯嬌小。酷愛戶外活動的YoYo，最愛帶寶貝狗跑步keepfit，日前她穿上運動裝又拖狗出動，Anna走在主人身邊，非常馴服。
乖女 守身如玉
YoYo和Anna這段寵物情緣，始於網上，她說：「朋友介紹我上網買狗，我逐一細睇佢哋放盤啲相關資料，然後再約狗場嘅人帶隻狗出嚟見面，我同Anna一見鍾情，我鍾意西摩白雪雪，成隻熊咁，攬住佢好舒服，而且Anna個樣好善良，好似識笑咁，睇見佢就乜煩惱都冇晒。」
對於不少愛護動物人士都呼籲主人及早為寵物做絕育手術，免除後顧之憂，YoYo卻恨抱孫，至今仍猶豫不決，她說：「我仲心大心細，好想見證Anna生BB，我可以擁有小Anna，不過家Anna得7個月，仲算係BB狗，所以我都唔捨得要佢咁快懷孕，我怕佢會好辛苦，或者等遲少少先再諗。」
YoYo為保Anna貞操，每次帶她出街都看管甚嚴，YoYo笑言將來替Anna揀狗女婿時，必定落足眼力，似乎比自己的擇偶條件更嚴謹！她說：「一定要靚嘅品種，因為Anna咁靚，我肯畀佢生，主要想留低有佢基因嘅狗B，由於我唔係咁心急，所以我會小心物色。」
奀皮 辣口摧花
尚未升呢做「外婆」的YoYo，樂得多花時間與Anna共處，她說：「直至家，我買佢返嚟先得4個月，我希望花多啲時間大家溝通吓先。」YoYo大爆Anna奀皮史，她說：「有次我開工，獨留佢喺屋企，返到屋企見到佢咬爛咗我心愛嘅盆栽，真係好肉痛，當然我有教訓佢一大餐。」
YoYo教女三部曲
穿高跟鞋的天使
陳自瑤視愛犬Anna是掌上明珠，閒時不用開工，興之所至就愛拿着相機為狗囡囡拍照留念。Anna去年底成陳家新成員，抱牠回來時僅3個多月，現在已7個月，過去4個月的成長過程，YoYo媽咪除了悉心照顧外，還親自做攝影師，為狗囡囡拍下每個成長階段的變化，更編成電子相簿，與愛狗一族分享。
白毛勝穿衣
YoYo視替Anna扮靚為樂事，由於牠全身毛色潔白，加上是身形巨大，若穿上靚衫會不及小狗得意，所以YoYo會在自己的首飾箱尋寶替愛犬打扮，精美髮飾、珠鏈、帽子，甚至高跟鞋等都成為Anna的扮靚道具。
Anna私相簿中，以牠一雙前腿穿高跟鞋的照片最可愛，驟眼看去就像小女生偷穿母親的高跟鞋扮老人精一樣。YoYo則獨愛Anna在頸上掛上大珠鏈的照片，她大讚：「我覺得佢好有女人味，好靚。」
