Google台灣街景圖赫然出現裸女，香港街景圖噚日面世，好多人即時睇睇有乜意外收穫，或者自己會否上鏡，八方隨意「逛街」睇睇，果然有發現，竟然見到有人露兩點！
議員橫額被模糊
發現露點地方係大角嘴惠安街，從網上圖片可見，有兩個男人坐喺路邊，似乎在閒聊，其中一個男子冇着衫赤膊，就咁被拍下露點照片，相信佢都估唔到自己會上鏡；由於街景圖出現嘅路人樣貌會特別處理，所以露點男廬山真面目冇出街。Google有投訴機制，任何人覺得被侵犯私隱可以投訴。
八方睇街景見到露點男，有網民則發現部份法輪功掛喺路邊橫額都被特別處理，質疑Google政治審查，既然Google可以退出大陸市場，應該冇乜需要針對法輪功，有網友認為可能係因為橫額上中國個國字係簡體字，電腦系統識別時出問題，才會模糊咗個字。八方又發現幾乎所有議員街上橫額上張大頭相都被模糊，少咗政客面目，條街睇落企理好多。