花旗股市前晚造好，市場唱好科技股同工業股，不過納指同標普500指數已經升咗好多日，仲有冇力再上唔係好肯定。
亞洲方面，日股噚日突破10600，好大機會上試11000關，亦有利港股氣氛。
吉利C輪19051：吉利汽車（175）昨收4.16元，升3.7%。母公司收購富豪汽車嘅消息屬利好，但係吉利嘅股價就橫行咗8日，噚日先至炒上，而且成交大增，似乎係時候開車，可以諗吓隻C輪19051，博正股升破4.50元推向5元。
隻輪現價86仙，2010年6月25日到期，行使價3.68元，溢價9.1%，引伸波幅69.7%，有效槓桿3.3倍，正股見5元，19051睇1.51元，正股跌穿3.90元，就沽咗隻輪止蝕。
俊樺