陳柏宇的唱片公司與無綫的版稅糾紛還未得到解決，但他坦言冇有怕，以正面態度面對，在這段時間裝備自己，靜待時機。公司對他特別看重，最近幫他推出高品質光碟，而陳柏宇也想開拓快歌市場，不過他希望唱的是不用跳舞的快歌。
陳柏宇（Jason）被公司譽為新一代靚聲王，公司特別將他部份唱片，製作成高品質光碟Blu-SpecCD，重新推出，好讓一班Hi-Fi發燒友可以認識多一把聲音，問到Jason被公司封為靚聲王，Jason笑說：「唔敢當，係有人話我過把聲比較特別，容易俾人認出，但係咪靚聲就見仁見智，反而我係想唱多啲唔同類型嘅歌，入行以來都係着重唱抒情歌多啲，但係身為一個歌手，唔可以只係唱一種歌路。」
與公司同進退
其唱片公司與無綫的版稅糾紛還未解決，對於正值搏殺上位的Jason，始終有所影響，天生樂觀的他卻有另一種看法，他說：「我相信公司唔會想自己歌手唔好，公司做得呢啲決定，一定會共同進退，亦都好相信公司做法，我唔會諗得太灰，反正之前太多嘢做，家有時間咪多啲練歌，學多啲嘢裝備自己，諗得正面啲，就唔會有擔心。」
寧花時間學琴
Jason希望擁有自己的快歌，不過他會選擇唱不用跳舞的快歌，他說：「其實我都有學過跳舞，但真係冇興趣，跳唔掂囉，學費又貴，如果要我使錢，希望係我有興趣同對我有幫助，好似學琴咁，學完我就可以自己作歌。」
問Jason是否想當創作歌手？他坦白說：「都想向呢方面發展，但真係要學多啲樂理先，最基本都要識睇樂譜啦，其實我之前都有作過曲，不過全部俾公司話未見得人，要繼續努力。」
採訪：胡比
攝影：林德雄
場地提供：Purple6