領匯（823）一個月內再有高層地震。繼今個月初首席營運總監（COO）區道賢（RossO'Toole）請辭後，噚日輪到執行董事兼行政總裁（CEO）羅爾仁（IanRobins）。領匯噚日公佈，話羅總裁今年11月做夠三年約滿之後就唔再續約，計劃返袋鼠國老家。計埋舊年11月領匯項目及發展總監樓進德（ScottNugent）遞辭職信在內，三位老外高層先後唔撈，反映澳洲幫時代正式落幕。
接替行政總裁嘅，係昔日投行賓架、現任領匯首席財務總監王國龍（George）。現年48歲嘅George可謂平步青雲，舊年1月中加入領匯出任「掌櫃」，2月已經「升呢」入董事局兼任執行董事，今次再上層樓，入咗領匯短短14個月已升做行政總裁。George正式出任CEO日期有待公佈，而領匯同時亦會為首席財務總監展開招聘工作。