國際佛光會創建人兼佛光山道場開山宗長星雲大師噚日由台灣嚟咗香港，接受香港大學頒授嘅名譽社會科學博士，大師相信呢個銜頭純粹係表揚佢一直做嘅教育同慈善服務，同六四後收留前新華社香港分社社長許家屯一事無關。大師為人開通，唔介意俾人叫做政治和尚，認為政治都係一種對社會嘅關懷。
被問到當年許家屯事件，現年83歲嘅星雲形容係好遙遠嘅事，當時只當許家屯係一個中國同胞，單純以佛教立場去收留、畀佢一啲方便，認為「沒有甚麼對國家不利。」
大師慨嘆自己年紀大，眼同腳都唔好，經常要用輪椅代步，好多事都力不從心，但就好開通，話叫佢乜嘢稱號都冇所謂，弘揚佛法、教育、慈悲定係政治和尚都可以。
推行三好四和
除咗星雲大師，經濟日報集團主席馮紹波、心理學權威楊雪姬同港大內科學系名譽教授余宇康噚日都獲頒名譽社會科學博士；醫學界嘅陳展邦就獲頒名譽科學博士。大師接受完港大校監特首曾蔭權「扑頭」後，代表各名譽博士致辭，話自由、民主雖然重要，但如果有咗自由、民主，但世界唔和平、人民唔可以安樂生活都係冇意義，又寄望兩岸關係和平友好，因為「都是一家人」。
大師最後勸勉大家口要說好話，要做好事同埋有好心腸嘅「三好運動」，希望一齊推動家庭、人際間、社會同埋世界「四個和諧」。
噚日TVB董事利孝和夫人都有出席頒授典禮，被問到陳志雲被捕事件，佢只係笑笑口話：「咁開心嘅日子，講啲咁嘅嘢？」講完即刻埋位就坐，閃問題都閃得好高貴。