已育有兩女的周國賢日前第三度榮升老竇，其韓籍太太於剛過去的周日剖腹誕下體重8磅8安士的肥B千金。周國賢指養育三個囡囡令他斷擔挑，還苦笑謂要「紮咗佢」。
現年30歲的周國賢（Endy）早年入行已公開已婚身份，其大女現時7歲，次女則剛滿兩歲，去年他和韓籍太太李美英還計劃兩個夠晒數，豈料天賜厚禮，太太意外懷孕。在剛過去的周日，周太入院開刀誕下8磅8安士女嬰Elisia，Endy更入產房直擊B女出世，拍攝DV短片留念。
搬平屋慳得就慳
由於今次周太再度懷孕的消息從未曝光，故Endy又做老竇確實令人愕然，他昨接受電話訪問時笑說：「其實我太太大肚時都有周圍走，不過冇特別講啫。呢次完全係意外，BB嚟到係緣份，但之後就發現好多經濟問題，搞到要搬屋。」本來Endy一家四口居於貝沙灣，但因長女Clara已７歲，BB又剛出世，惟有搬離貝沙灣豪宅，選擇入住租金較平但面積較大的寓所，Endy說：「要降grade，但我都想住番港島區。」
周國賢續說：「佢好得意，同二家姐（次女Rachel）同一日出世，本來計好時間3月8日婦女節出世，點知等唔切早咗一日。我太太呢次個胎嘅腳向下，順產比較危險，所以開刀。上兩次兩個BB都瘦啲，呢個就係肥B。」
Endy指Clara一見細妹便笑她樣貌似爺爺，而下巴和嘴鼻都偏向似他較為男仔，頭髮又多。目前他一屋女人，不知會否追多個仔？Endy即說：「唔好玩啦，不如紮咗佢算啦！自己生仔生女冇所謂，媽咪係想有個男孫抱吓，但驚生多個唔係仔，都係唔應該生多個嘅。」
採訪：葉雪