大市悶蛋，新聞好睇得多。噚日中港兩地上演電視台風雲，三色大台有高層被請飲咖啡；另一邊廂亞記就擺酒請客，大事宣揚同中國人壽（2628）、招商銀行（3968）、中國海外（688）阿媽中國建築、北京銀行同粵海集團簽約合作，即使冇具體內容，意識形態上已告知北大人已空降香港傳媒，遲吓除咗有老翻三色CCTV之外，仲有正牌中央亞洲台。
好一句「香港不能沒有亞視」，令ATV股東劉長樂旗下嘅鳳凰衛視（2008）都彈升近4%。一向低調嘅查懋聲突然使出連環拳，喺兩會期間高調見記者反擊，原來一早泊好碼頭，突然集齊人馬簽約兼晒冷。中國建築總經理孫文杰話集團大把錢，亞記要幾多有幾多，仲爆響口話香港嘅繁榮穩定靠晒亞視。
呢次擺明車馬國企力撐入股，民主戰士最擔心嘅國進民退終於殺到埋身。近日睇報紙，知道唔少記者刮緊王征，但鮮有人幫佢起底。到底點解呢個「港人」可以成為地產大亨，又點解佢可以50歲未夠就集齊全國政協委員、全國青聯常委、中國青年企業家協會副會長等光環？
曾祖父係清末首富
據報王征嘅曾祖父盛宣懷，係清朝重臣李鴻章左右手，亦係清末輪船招商局嘅創辦人。盛宣懷被喻為「中國近代工業之父」，亦係清末首富，生意除咗航運仲有銀行、紡織、鐵礦同電報，甚至上海交通大學同天津大學都係佢創立，據講盛宣懷死後，遺產加埋地產多達七千萬両銀。
咁多錢梗係觸發連場豪門恩怨。話說老子死後有3個癮君子敗家仔，好彩有「大奶奶」睇住盤數，點知老夫人一死，加上北洋政府倒台，敗家仔就叫分家產，到最後5房人要對簿公堂。
王征就係名門望族嘅第四代。據內地傳媒講，佢跟阿媽姓王，但流住盛家嘅「藍血」，80年以全國高考總分第二名、俄語第一名成績考入上海華東師範大學；上世紀90年代嚟香港後，炒天水圍樓起家賺到第一桶金。咁嘅天才兒童，唔好再當佢係羊牯，只識以貌取人嘅至係頭號儍仔。
胡孟青