天氣忽冷忽熱，濕氣又重，莫講話馬拉松選手跑到拉柴，連屋企部電子產品亦隨時發霉！唔係嚇你，每逢春天，相機一定高危！如果你唔想心愛嘅DC、具紀念價值嘅照片或珍藏品變成炮灰，嗱嗱臨買個防潮箱，甚至以最慳家辦法，自製番一個亦得！
記者：陳國輝
攝影：陳盛臣
Model：Algie@PureModels
鳴謝：DCPower（23846698）
防潮箱百零蚊搞掂
大家可能無留意，查實相機袋唔可以防潮，一旦發霉就好難救得番！坊間有多款防潮箱俾你選購，平平哋百零蚊就有交易，如HAKUBA就出咗款茶色透明膠箱，容量只有5.5L，雖然細啲，不過面蓋內附設白色膠邊封口，加埋附送嘅防潮劑，你只要另購濕度計，就立即用得。
唔使煩電子箱自動防潮
如果想玩得專業啲，咁可以揀個電子防潮箱，售價由數百元起。好似今次介紹呢款收藏家HD-40G，容量達到40L，佢最大作用係內置濕度調校器，唔同情況下，可自行選擇高、中、低抽濕效果，更專業甚至可指定某抽濕百分比，要留意電子防潮箱採用金屬製，擺屋企較為笨重。
DIY
一嚿水有找
如果你認為百零蚊都貴，仲有方法幫你慳錢，就係自製一個防潮箱！你需要買嘅用具，包括附扣嘅連蓋紅A膠箱（約$40）、可循環再用嘅抽濕珠（約$25），以及一個濕度計（約$20），加埋都係一百蚊有找！
入箱前，記得抹乾淨部DC，吹走鏡片上嘅塵埃，然後放入抽濕珠及濕度計即可封箱。但要注意，由於箱內太乾燥也會令機身龜裂，所以你需要經常留意濕度變化，最佳環境係百分之40至60；抽濕珠變成紫色，表示已裝滿水份，有玩家話，以中慢火放入微波爐叮4至6分鐘，就可以循環再用，Work唔Work試過先知，但放微波爐時間不能太長，以免造成危險。
