【志雲難局之震撼全城】陳志雲身為無綫總經理又是節目主持，錢國偉則是多個大型節目的監製，二人與不少無綫藝人及歌手都有交情，但昨日無論與他們熟與不熟的，都實行講少錯少，免被牽連其中。綜藝科監製陳志球及戲劇科監製劉家豪在電視城見記者即掉頭走，陳志球還無奈說：「唔關我事o架！」
身為無綫包薪藝人的佘詩曼昨日與兩女友人在置地廣場嘆下午茶，被問到對志雲事件的看法，她擰頭不回應，匆匆離開。
採訪、攝影：朱志聰、張俊銘、王連連、溫敏芝、王崇穎
黎耀祥：冇防貪污指引
「公司冇特別通知，喺公司都好少撞到志雲，我哋過年前喺新書發佈會見過，都有啲擔心佢，佢係幾有才能嘅人，但家唔知乜事，唔方便評論。最近好多風雨，希望可以快啲雨過天青，暫時唔會打畀佢，畀佢靜吓啦。其實無綫好似冇對員工提供防止貪污指引，就算有都唔係好覺，我都好少留意，我哋係藝員，大家唔同層面，我哋又唔會做製作方面工作，所以應該冇牴觸。」
陳奕迅：希望志雲冇事
「作為朋友，希望陳志雲快啲冇事，我未sms佢。我唔知錢國偉被捕，我嘅演唱會係陳家瑛製作公司搞，監製唔係錢國偉。」
容祖兒：件事我幾震驚
「陳志雲接受緊調查，唔應該有評價，但對於呢件事我幾shock（震驚）。上個禮拜我哋至同錢國偉一齊做英皇十周年個騷，我冇試過同陳志雲嘅公司合作，亦唔知佢有公司喎。」
呂慧儀：好多利益誘惑
「我今日返公司睇到新聞先知，都有同錢國偉合作過，佢做嘢OK，但其他嘢我就唔清楚，呢個圈好多利益誘惑o架，我就冇呢啲嘢，連同啲演員食飯都會AA制，不過家只係調查啫，我會做好本份，唔會影響公司正常運作。」
湯盈盈：唔知乜叫受賄
「我都唔知乜事，唔太清楚，唔知擔唔擔心呀，我同錢國偉有合作過，等佢忙完先聯絡佢啦，我都唔知乜叫受賄。」
原子鏸：邊個係陳志雲？
「我唔係好睇電視同新聞，唔記得陳志雲係邊個，其實我只簽過無綫一年，我都唔知要有乜反應。」
黃宇詩：志雲好nice
「我未留意呢個新聞，要了解咗先講。陳志雲對人好nice，冇架子。無綫係大機構，會有佢嘅運作方法，我唔擔心受到影響。」
張智霖：收聲當幫忙
「我同陳志雲認識但唔熟，希望佢吉人天相啦，佢都想請我去佢節目，但檔期問題未能成行，未深入彼此認識囉，我相信佢係好人，旁觀者收聲當幫忙啦。」
官恩娜：送利是算唔算？
「我同錢國偉都熟，有關當局會處理，我哋乜都唔知。講到貪污，中國人係禮義之邦，送利是唔知算唔算？至於食飯我都好少，冇乜飯局，基本上都冇同其他公司高層食過飯，送禮更加唔會。」
