政府最近招聘文書助理反應熱烈，皆因呢份工僅中四畢業就可入職，人工由8,950元至頂薪15,785元，對低學歷或後生仔而言真係筍工，因此入表者眾，郵局近排要處理唔少求職信，不過，有郵差同八方講，好多求職者等到頸長都冇聲氣去面試，以為已經被篩出局，實情係份表根本寄唔到去政府，梗係冇運行啦。
點解份表會寄唔到去政府呢？是咁的，申請政府工，要填妥一份有六頁紙嘅申請書，連同學歷證明副本郵寄畀有關當局，唔少人為求一擊即中，連幼稚園畢業證書、小狼隊獎狀副本都奉上，一大叠嘢寄出去，咁就出事嘞。
1.4元郵費限重50克以下
根據規定，重50克以下信件郵費係1.4元，但份表連同多張證書副本，好自然就唔止50克重，超出呢個重量，重100克以下信件，郵費要3元，封信越重郵費越貴，好多求職者唔知係唔知規矩，抑或想偷雞博大霧，都只係貼1.4元郵票就寄出。
郵局收到畀唔足郵費嘅信件，一般程序係要求收信人補回雙倍差價，譬如話郵費要3元，卻只貼1.4元郵票，即係欠1.6元郵資，收信人就要畀3.2元先收到信，政府部門冇需要倒貼畀求職者，唔會補貼差價，由於呢啲求職信多數冇寄件人地址，郵局冇辦法退回寄信人，惟有抽起信件，再送去指定地方銷毀，而求職者搵筍工嘅願望，亦同時破滅。
有郵差講，粗略計算有約四成應徵政府文書助理嘅信郵費不足，早排請郵差，更加有過半信件唔夠錢，佢話相信好多人好有心機填表求職，睇信封面字體相當工整就知，卻因為貼唔夠郵票而失去筍工機會，真係相當唔抵。
兩年二萬五信件郵資不足
郵政署提供資料，過去兩年共有約250,000件郵件郵資不足，佔每年數以十億計郵件比例唔多，當中83%可收回差額，涉款54萬元。八方最後提醒大家，文書助理今日截止申請，如果大頭蝦畀少咗郵費，記得補飛先寄份表呀！
mailto:[email protected]