民主黨創黨主席李柱銘從政之路幾乎未輸過，原來仲試過「不戰而勝」。馬丁噚日喺中大一個討論功能組別廢存問題論壇上同現場同學仔話當年，講番當年85年膽粗粗參選法律界功能組別，原因係受幾大同行推薦，話佢夠直夠敢言，最啱做法律界代表，結果馬丁處男下海參選，擊敗當時法律界老前輩列顯倫。
一鳴驚人嘅馬丁當然好開心受到業界認同，但佢笑笑口話贏咗之後先知道點解啲老友記會叫佢去選，因為自己一旦做咗議員，法律上嘅生意業務好自然流失去晒冇議員職務在身嘅老友記度，估唔到班老友記咁鬼馬。88年立法局馬丁更加自動當選，換言之都試過「不戰而勝」喎。