屋宇署前署長蔡宇略間屋漏水害慘樓下住戶單嘢，今年初俾鄰居踢爆後，喺網上唱到街知巷聞，但係蔡博士依然故我，死唔認錯，堅持唔肯維修。
食環署早前派人去過佢屋企調查咗幾日，但唔敢肯定漏水嘅源頭係咪佢屋企，於是交咗畀屋宇署接手，呢次終於有啲成績嘞。
屋宇署其實幾年前都調查過蔡宇略間屋，點知查完一輪之後，始終檢控唔到蔡宇略，結果俾人鬧係怯於前署長官威所以腳仔軟。八方聽講，屋宇署今次唔敢再怠慢，食環署一交咗個case過嚟，就即刻開始做嘢。屋宇署早幾日派人去過蔡宇略屋企做完測試，好快有結果，證實漏水源頭就係蔡宇略屋企。
人證物證俱在，蔡宇略冇得再抵賴，據聞佢已經向屋宇署承諾，會盡快搵裝修師傅整好個漏水位，但係幾時搵人整，同幾時整好，就一句都冇提過。