一年一度嘅香港打吡大賽即將開戰，身為今屆入選參戰馬匹威利旺旺嘅馬主莊友堅，對愛駒充滿信心。事前先來一場打吡前哨戰，不過今次係試車唔係試駒，愛車如愛馬嘅他直言兩者嘅速度都為他帶來快感，首次試駕擁有V8引擎嘅Mercedes-Benz四驅ML63，大讚爽快。
記者：許維雅
攝影：譚盈傑
愛AMG有品味
愛駒威利旺旺將於後日香港打吡大賽出征，心情顯得有點緊張嘅股壇名人莊友堅（Eugene）一直對這個冠軍寶座虎視眈眈，原因簡單直接：「人有我有囉！」此話一出，亦道明同樣愛車嘅佢為何會有三四十部車在手，除了平治，更有勞斯萊斯、Bentley及法拉利等名車。養馬養車同屬男人燒銀紙玩意，還會為退休馬鋪路返家鄉養老，表現長情嘅佢買車宗旨亦如出一轍，「後生時有諗過要嘅車咪買囉，所以特別鍾意儲番細個曾經擁有嘅模型車。」買車選擇因而不會刻意求新求快，所儲車款除包括古董車外，亦曾經擁有多部不同年代嘅Mercedes-BenzAMG系列，「鍾意AMG因為細個時睇廣告睇得多，所以廣告好有用o架！以前鍾意車，家鍾意埋馬，都係因為鍾意速度感，不過要有速度感都要講品味，AMG系列多年來都咁受歡迎就係因為設計上有品味。之前都有考慮過買C63AMG，但最後都係覺得S500較實用。」
AIRMATIC懸掛軟硬適中
貴為中南證券話事人嘅Eugene，平日出入一向有司機代勞，好少自己揸車，但首次試駕Off-RoaderML63，表現一樣有板有眼，踩油、掟彎無腳軟，全因每個星期日都喜歡靜雞雞出去飆車。「好耐之前，我仲會落手落腳整車，家忙先改為畀錢人整。呢架ML63的確好快、好好力，同級嚟講，AMG引擎實在係最勁，尤其係新一代嘅V8，簡直難逢敵手。頭先試完幾個圈，發覺佢新一代嘅懸掛設計好咗好多，感覺好舒適。」0-100km/hr只需5秒、最高時速達每小時250公里嘅ML63，澎湃力量固然輕易討Eugene歡心，而軟硬適中嘅AIRMATIC懸掛除了舒適，其實還為操控帶來更大嘅穩定性。不過坐慣後座嘅Eugene認為ML63仍有要改善嘅地方，「佢嘅內櫳似乎細咗啲，車，梗係越大越好！同埋後座應該要設計得更加舒適，可以調低方便休息。其實最新AMG車系之中，我比較喜歡房車E63，夠豪華又靚、坐得舒服又夠靜，老闆代步車嘅要求就係咁簡單。」
規格
引擎：6,208ccV8
馬力：510hp/6,800rpm
扭力：630Nm/5,200rpm
傳動：7G-TRONIC
售價：$1,538,000
查詢：25948128（AMGStudio）
周日平治賀打吡
將於本周日沙田馬場舉行嘅Mercedes-Benz香港打吡大賽，今年踏入第133屆，呢場香港一級賽事嘅總獎金達1,600萬元，冠軍馬主可獲得650萬元獎金，但更興奮梗係可與練馬師及騎師乘坐Mercedes-Benz開篷跑車在草地跑道巡行，接受馬迷祝賀，威水一番。
