特首「替工」唐公子上星期六出席青年活動時，被失業人士掟鞋，怒向高官掟鞋嘅文先生，原來係社民連黨員，而當日瞓喺車路攔截唐公子座駕嘅青年Anson，又係跟社民連嘅，不過兩個人都係個人身份出擊，黨主席陶君行都係事後先知道，大讚青出於藍。
陶君行稱無為而治
阿陶同八方講，十幾年前佢都試過燒車胎，所以好理解後生仔呢啲行動，佢更笑言時下後生仔，既不受政黨指揮，更不能輕易動員，「佢哋自發行動，根本唔聽大佬講。」佢話只要黨員行動不違反社民連綱領就不會過問，「支持功能組別梗係唔得啦。」
黨員自把自為，社民連好似無人駕駛狀態，阿陶強調只係無為而治，「喺網絡年代，你管得幾多？」八方思疑社民連成員掟嘢成癮，前主席毓民掟蕉驚天下，舊年7月在書展向TVB陳志雲掟書，早前喺《城市論壇》掟bra，都係社民連，最新傑作係掟鞋，下次掟乜好？阿陶好認真咁講，「真係唔知喎。」