【本報訊】參加五區公投運動的社民連「長毛」梁國雄昨日呼籲，民主黨支持者應運用獨立思考，在5月16日五區公投中，踴躍就爭取真普選的公投議題投票表態，「投票畀五區公投嘅人，唔等於以後要再投畀佢，今次係選議題唔係選人。」他又形容，公投運動現正內外受敵，相信北京在人大、政協會議結束後，將加劇對公投進行抹黑、打擊和分化，「希望民主派嘅人唔好加埋把口落去，亦希望民建聯班打手唔好咁得戚，因為呢個世界真係有報應。」
梁國雄昨日接受網上電台「青台」訪問時指，五區公投現時雖然內外受敵，但港人只要憑良心做事，到公投時積極投票，五區公投將不會受到影響，「今次唔係我哋同泛民嘅人決勝負，係泛民一齊同我哋嘅對手，尤其係同共產黨政府決勝負，如果大家因為聽咗啲妖言惑眾嘅說話唔去投票，只會悔之已晚。」
公投是「反23條演習」
他形容五區公投是一次「反23條演習」，低投票率將令保皇派能輕易奪取議席，「唔投真係好大鑊，唔投即係香港人唔關心。」
梁國雄質疑，民主派毋須在5月16日投票前突然到訪上海，「同共產黨依依泣泣」，又坦言難明終極普選聯盟為何要與被民主黨黨鞭司徒華稱為「香港江青」的范徐麗泰拜年溝通，「有乜理由華叔點咗名係香港江青嘅人，你家個個走去打躬作揖先！」