愚人節仲有大半個月先到，環境局副局長潘潔卻率先同全港運輸業界開咗個天大玩笑，最犀利係局長邱騰華都玩埋，環保署都要陪笑，潘潔搞笑勁過星爺，唔做高官可以做小丑。
透露想按排廢程度收費
話說立法會改善空氣質素小組委員會噚日早上開會，潘潔在會上指出，現行資助車主更換歐盟前期及一期柴油商業車輛計劃於本月底結束，然而換車計劃反應差，只有22%合資格車主換新車，為咗加快淘汰噴黑煙舊車，潘潔稱正考慮由4月1日起提高15年車齡以上柴油商用車輛牌照費用，意味如果車主堅拒換新車就要捱貴牌費。
為咗趕絕馬路上噴黑煙「墨魚」，潘潔更透露想按車輛排廢程度收牌費，黑煙越勁牌費越貴。潘潔連環出辣招，運輸業即時鬼殺咁嘈，貨櫃車主聯會主席黃基話，金融海嘯後生意難做，就算政府資助，車主都難以負擔換車費用；落馬洲中港貨運聯會主席蔣志偉直斥潘潔廢噏，排廢肯定超標，事關任何車齡貨車都要年年驗車，冇超出法定排廢標準先可以續牌，有乜理由針對高齡貨車額外加牌費！
唔諮詢就逼人換車，無異於環保版23條，潘潔咁惹火，搞到司機大佬㷫烚烚，環境局局長邱騰華恐怕燒到埋身，幾個鐘頭後即刻撲火，下午喺立法會會議上補鑊，稱自己冇政治能力喺4月1日加牌費，即係當潘潔冇講過算數。
局長開腔後，呢場足以觸發貨車堵塞中環嘅政治危機暫時解決，不過環境局朝令夕改，高官前言不對後語鬧劇卻未落幕，繼續死雞撐飯蓋。環保署強調，車主對資助換車計劃反應不理想，顯示單靠經濟誘因不能夠鼓勵車主盡早換車，所以當局仍想透過加牌費逼車主換新車，只係現階段未有具體建議啫。
隨時觸發司機圍禮賓府
其實08年11月環境局已就加牌費建議諮詢議員同業界，但面對強烈反對而擱置至今，邱騰華都承認冇能力解決，潘潔今次真係玩死好多人，萬一司機又入埋煲呔數，圍堵禮賓府，就真係唔講得笑喇。
mailto:[email protected]