台灣人氣偶像阮經天本來同女友許瑋甯糖黐豆，但上月底被爆背着女友偷食，佢被發現帶長髮女子喺台中酒店開房，雖然小天事後承認同房唔同床，已令女友許瑋甯嬲爆，小天呢幾日仲開始番掂女友。
影了過百張照片
不過小天一波未平，一波又起，噚日又被爆喺台中金錢豹酒店攬女，相中嘅小天同辣妹頭貼頭鬼咁親密，背景仲發現有廁所，鬼咁似酒店房間嘅擺設，呢批相仲有一張係辣妹同小天，身邊仲有《艋舺》導演鈕承澤，有指相中辣妹同被爆酒店開房嘅女人係同一人，小天噚日喺台灣錄影節目《娛樂百分百》時，佢親自澄清：「這是不同日子的事，兩者不同人。」
小天強調同辣妹嘅相係上月8號喺金錢豹酒店影嘅，佢話當日係陪鈕承澤去答謝協助過拍《艋舺》嘅江湖中人，小天話嗰日酒店好似簽名會咁熱鬧，仲話：「我至少拍了一百多張照片，那個女是粉絲，她很無辜。」
問到佢有冇同女友解釋呢件事，噚日朝先喺上海返台灣嘅小天話：「我一下飛機就來這裏，這事也沒甚麼好解釋的。」佢仲話唔擔心呢排咁多是非，佢信心十足咁話：「我從小到大就皮厚，我打不痛。」
至於許瑋甯話堅信小天：「撇開之前的事（指開房間）不說，去酒店從頭到尾的細節我都知道，沒理由不相信他。」
許瑋甯信任小天
有指兩女其實同一人，許瑋甯話：「我的想像力沒那麼豐富。之前的事已告一段落，工作、家人和朋友都是我生命中重要的事，一定要發生一些事，才能讓他（小天）知道這些人和事在生命中的比重。」