股海牛皮到暈，呢種市況下仍戀棧證券行，簡直係有種虛度光陰感覺。大市昨日成交縮到只得551億元，個市上落幅度又唔大，散戶入市叫苦連天，事關呢款市況之下真係唔易炒作，有時甚至入貨後想「游水」都好難，可想而知市況幾咁靜。
雖然大環境氣氛好靜，不過市場咁大，點都有股票可炒，散戶呢期普遍轉攻細價股，事關細價股見異動炒上，根本可以唔理市況升跌；另外，呢期適逢上市公司輪流派成績表，跟炒股份業績亦係應付悶市良方之一。
莎莎國際（178）走勢簡直係放紙鳶式上升，昨日再升3.3%，收報6.19元，氣勢咁勁，無謂估頂。另一隻同類股卓悅控股（653），守穩8元之後亦開始發力，昨升1.7%，收報8.20元，成交大增，可伺機入市，目標9.50元。
卓悅將於本月底派發成績表，上半年純利有6940萬元，同比增長18%，下半年一向係化妝品銷售旺季，故憧憬全年業績應有一定瞄頭。
方星俠