進入藍籌業績期以來，除咗驚嚇以外，首次有公司嘅業績有驚喜。中信泰富（267）扭虧為盈大賺近60億元，除咗因為去年澳元大蝕過百億嘅虧損上晒阿媽身，業務重組最緊要嗰部份，就係中央派出消防隊隊長常振明施展魔法。
以往中信泰富唔夠透明度，家族管理色彩濃厚。常振明接掌後一反傳統，首先大力整治管理團隊，將得力助手張極井由中信集團調落嚟。張喺去年11月上任，之前係中信集團首批派落嚟嘅「捉鬼隊」，負責處理榮家留落嚟嘅「蘇州屎」。
常振明大大聲話要做全球管理最好嘅公司，聽起嚟好大口氣，但個人又對佢幾有信心。上市公司成績係點，睇盤數就易，最難反而係睇人。金融海嘯之前，邊個會信咁大間中信泰富會炒燶Accumulator上晒身，奇就奇在邊個負責簽有關合約，過去咁多年到底公司參與咗幾多高風險投資，股東全被蒙在鼓裏。
直到佢空降坐正，即時搵顧問公司做Audit，同財務部員工照肺，又將值錢資產國泰航空（293）出售，整靚盤數，係佢嘅拿手好戲。
常振明三度臨危受命
有番咁上下股齡嘅朋友，會記得常振明入主中信集團之前，曾執掌中信嘉華銀行同建設銀行（939）行長，幫銀行執靚盤數。當年建行係十個煲得九個蓋，顧得盤數嚟又睇唔實人事問題，突然喺上市前爆出董事長張恩照受賄事件，搞到招股反應唔多好，最終夥拍美銀先可以成功上市。建行能夠上市並成為亞洲最賺錢銀行，佢功不可沒。
再早啲喺2000年中信嘉銀，又係因為董事長受賄挪用公款，當時該行不良資產比率竟然高達35%，常振明遂透過收購華人銀行幫公司脫困。
接手中信泰富初期，佢講過話有幾個方法解救，一係中信集團借錢或注資，但對解決對冲合約虧損黑洞冇幫助；一係注資加清理資產負債表，將有毒資產抽離。事實證明，呢個係最佳方法，亦再次證明呢位圍棋高手低調實幹嘅驕人成績。
有信得過嘅管理層，投資者大可放心，至少佢肯定唔會因為貪而被人拉去坐監。
胡孟青