黎明在電影《火龍》中犧牲色相，要黐滿臉鬍鬚做粗獷男，他只知臉上的假鬚是用河馬毛造，同戲拍檔任賢齊卻大爆在片場內聽聞，黎明臉上的是河馬陰毛，但當事人卻被蒙在鼓裏，還要忍受不能大笑及不能吃東西的苦況，以免假鬚會爆開。
黎明前日出席新戲《火龍》記者會後，晚上又與導演林超賢、任賢齊及葉璇於荃灣出席該戲MV首播禮。黎明心情大好，在活動上談及在戲中要辛苦黐鬚的感覺，還笑說：「啲鬚都唔知係邊種動物邊個部份做成o架，感覺好河馬，聽講係河馬某部份嘅毛做成嘅。」
「問吓佢有冇味」
小齊大爆黎明的假鬚是用河馬陰毛做成，他說：「我哋喺片場聽講，係揀河馬嗰個器官啲毛，不過我唔確定，都係聽講咋，唔知真定假定係講笑，不如問吓佢有冇味啦！」黎明知否臉上的假鬚是河馬陰毛？小齊說：「佢好似只知係河馬，嗰啲應該唔知。」小齊謂每當黎明黐完假鬚後，為免皺起都不能大笑，吃東西又不方便，故小齊常會藉機整蠱他，小齊說：「我哋不停喺佢面前食嘢同講笑，佢一大笑啲鬚就會爆，所以忍得好辛苦。」
黎明前晚與觀眾玩問答遊戲，當其餘演員都問一些無關痛癢的問題，讓觀眾輕易贏取戲票時，黎明卻問觀眾：「《火龍》喺4月1日上映，係電影公司整蠱你定真係上畫？」觀眾答是整蠱，結果錯了，後來他再問另一觀眾：「你4月1日去戲院買《火龍》飛，售票員話今日冇做《火龍》，你信唔信？」該觀眾答：「唔信，我話要買飛。」黎明得意地說：「啱喇。」活動完畢，他不接受訪問便匆匆趕回家，似乎要陪嬌妻慶祝結婚周年，小齊被問到知否黎明結婚兩周年，他說：「我唔方便答，答錯咗唔好意思。」
小齊考慮求婚
問小齊可有與女友浪漫慶祝過？他謂：「嚟緊白色情人節同埋我哋相識紀念日，啲女仔好記得o架，我就要助手提。」他謂未知如何慶祝，可能要趕拍杜琪峯新戲。問他會否忽然向女友求婚？他說：「未諗，禮物都未諗，會畀心機諗吓啦。」
採訪：溫敏芝 攝影：黃偉雄