FC長春（白衫）噚日喺亞冠盃F組分組賽，主場狂數佩斯普拉9:0，開出個大熱7倍嘅「主其他」波膽。佩斯普拉喺呢組實力最弱，首戰主場對南韓嘅全北汽經已輸1:4，所以睇個戰果好似冇乜特別，不過其實另有內情。由於要轉機場關係，佩斯普拉由印尼飛嚟中國長春，就經已用咗成19粒鐘，搞到班球員飽受舟車勞頓之苦；咁到未算，噚日場波係喺氣溫攝氏零下6度進行，但唔好唔記得，佩斯普拉全年嘅氣溫係介乎攝氏22至32度，佢哋班球員一下子由咁熱嘅地方去到咁凍嘅地方，身體已好唔習慣，賽前經已要穿着羽絨練波；但係去到比賽冇羽絨着，仲唔硬晒軚，個個變雪條咩！FC長春對住班雪條，唔數你就奇；講真，佩斯普拉咁都係輸0:9，咪算輸得少囉！