馬會為迎接一年一度馬壇盛事香港打吡，噚日喺沙田馬場馬匹亮相圈做show，搞咗個「騎師crossover球星打吡前哨戰」，由已經火速升做大師傅嘅蔡明紹率領梁家俊、梁家偉、蘇狄雄及楊明綸4位見習生，同港隊嘅歐陽耀冲、陳肇麒、李威廉及葉鴻輝鬥踢波同騎木馬。
食西北風凍到騰騰震
噚日只得8、9度，而亮相圈喺正風口位，兩隊短衫褲喺度成個鐘，真係凍到騰騰震，好在射波、推波同騎木馬緊接而上，佢哋先冇咁凍。球員喺踢波環節勝出絕對唔奇，但佢哋騎木馬騎到手忙腳亂之下，結果竟以點數「騎」贏騎師新星隊，賽果就幾意外。
蔡明紹就話，閒時都有踢波，而踢波同騎馬一樣要講合作同策略；至於傷癒噚日復操嘅陳七就冇投注賽馬嘅習慣，但早已聽聞蔡明紹呢位馬壇新星嘅大名；可惜南華周六起程去馬爾代夫踢亞協盃，陳七、威廉同歐冲周日睇唔到蔡明紹喺打吡騎「快人快語」出戰。