俾前車路士隊友泰利送咗頂綠帽過佢嘆嘅布歷治，趁住曼城上周末冇波打，約埋隊友以及幾個朋友橫渡大西洋，去充滿陽光與海灘嘅美國邁亞密度假兼治療心靈上嘅創傷；睇佢一邊嘆凍飲一邊煲煙，又四周圍咁女，表現得鬼死咁風騷，相信佢好快可以重振雄風。
自從英國傳媒喺5星期前揭露，泰利背妻偷嗒當時仲係布歷治嘅同居女友佩龍塞爾（但布歷治同佩龍塞爾喺舊年7月已經分手）之後，布歷治就活在痛苦之中；而為咗避開泰利，佢仲宣佈退出英格蘭國家隊。好彩佢撐得住，仲喺個幾星期前場英超，助曼城作客贏由奸夫泰利領軍嘅車路士4:2，兼且拒絕同泰利握手，算係攞番個彩。由於喺啱啱過咗嘅周末曼城冇比賽，於是佢就同隊友胡禮菲臘斯同埋米卡李察士，以及班朋友去邁亞密輕鬆一下。
煲煙溝女放縱一下
難得嚟度假，現年29歲嘅布歷治梗係放縱一下，一邊飲住杯凍飲，一邊擔住飛煙係咁煲；而作為一個喺頂級聯賽比賽嘅足球員，煲煙當然會有損佢嘅健康同埋形象，但念在佢戴綠帽咁慘，煲煙或者可以治情傷，姑且畀佢咁做啦。
要治療感情創傷，最有效嘅方法梗係搵段新戀情啦。布歷治平時着波衫個樣，一啲都唔起眼，不過場外嘅佢，一身T恤牛仔褲及露出左臂紋身，仲戴埋副烏蠅太陽眼鏡；加上佢身形幾橫幾大隻，望落去真係幾有型，所以不斷咁俾女圍。而佢亦都老實唔客氣，完一個又一個，其中仲同一個身穿低胸豹紋短裙嘅黑人女仔特別投契㖭。至於之後仲有冇下文，當然就只有布歷治自己至知啦。
布歷治喺邁亞密治療完感情創傷後，希望返到英國之後可以踢好波，全力幫曼城同熱刺、利物浦同埋阿士東維拉爭英超第4啦！