雖然冇得同C朗及卡卡做訪問有啲失望，但多得鄭兆聰帶挈，終於可以同高大英俊嘅卡卡握吓手（備註：小記不是同性戀），總算不枉此行。
神級球員生人勿近
話說nowsports今次特別喺香港帶咗幅中文畫，寫住「卡卡先生，森巴王者」8隻大字，準備做訪問時送畀呢位巴西10號仔，點知訪問冇得做，但禮就可以收，不過就限制多多，唔畀拍片同影相。冇所謂啦，鬼叫人哋暑假用咗幾億買呢班球星嚟做生招牌，C朗同卡卡被迫變成生人勿近嘅神級球員。
有得近距離同卡卡見面，小記當然死跟；去到致送紀念品時，仲有機會同佢握手，一嘗肌膚之親，各位女球迷真係唔恨得咁多。話時話，卡卡隻玉手又厚又軟，唔係好識睇掌嘅小記，都肯定呢隻係大富大貴之掌，所以話巴西今個暑假破紀錄6奪世盃，個人認為絕對有可能。
卡卡攞完紀念品離開時，撞啱有好多皇馬球迷等佢，估唔到神級球員都咁親民，逐個簽名影相；小記多口問吓皇馬職員，原來呢班唔係球迷，係球會高層班鄉親，其他陌生人當然生人勿近啦。
收費揦脷
巴拿比奴球場內，有皇馬的歷史博物館，內裏收藏球會過去贏過的各項大小獎盃，是球迷必到的朝聖地，亦是皇馬吸金來源之一，成人每位票價要收15歐元（約157港元），14歲以小童都要10歐元，若一家四口參觀，入場費更超過500港元。
