好多人都話既然肥媽瑪利亞都諗住選議員，蘇施黃都應該去馬，以佢鬧人唔使本作風，入到立法會足以取代毓民地位，司局長見到佢唔驚就奇。幾年前葉劉參選時，曾情商蘇施黃站台拉票，葉劉噚日透露，已私下問過蘇施黃有冇興趣落場，蘇施黃明確表示冇意願參選。
葉劉引述阿蘇稱，對政治呢家嘢冇乜興趣，所以參選唔使預佢，助選就可以諗諗。另一位被傳有意參選嘅男拔校長張灼祥，雖然佢已否認，不過江湖仍然煲緊呢個消息，有人指張校長本來真係想退休，可惜金融風暴損失慘重，因此未能夠嘆世界。雖然張校長在135蚊高追滙豐，但如果長揸唔放，已收復部份失地，況且佢已續約，會喺男拔再坐一會，唔會咁快起身。