散戶有時掛住望實報價機，望吓望吓就以為喺賭場玩緊老虎機，喺升市中，順勢即市食幾格唔太難，夾硬要做淡，嚇到腳軟被挾死都未天光。
港股已連續兩日企穩於50日線之上，上升軌亦幾好樣，未來幾日若能力保不失，見22500試雙頂難度唔大。不過，睇圖係咁，呢一輪反彈肯定會較以往困難兼顛簸，睇實條上升軌，見低至買就穩陣得多。
市況冇焦點，突然爆單中國人壽（2628）無端端賺多咗嘅消息，唔知係邊個擺烏龍，盈利預測竟然可以重訂，仲要大升兩倍之多，股價破頂上升。若然真係較之前估嘅賺多咗，加上市場喘定投資收益有望提高，呢單消息又點止令佢升4、5個%咁大把。頭肩底頸線已升穿，大家知點度佢嘅上望目標啦。
德昌或恢復派息
喺指數唔升，但個別股份越升越有下，選中曉升嘅股份的確令人十分興奮。早幾日講過嘅莎莎國際（178）繼續創新高，一個唔覺意㩒錯號碼，隔籬門牌德昌電機（179）原來升得仲勁。1月中講過佢係工業股中嘅滙豐，當時股價三個七，若果讀者有耐性，如今回報都有16%，剛好避過大市見頂回落嘅跌幅。
好股唔買都要識吓，1月時大股東趕喺Blackout前起勢增持，持股量已接近60%。業務上，雖然賺少好多，但銷售額過半來自汽車產品，大客仔包括寶馬等。有車就有摩打，德昌嘅汽車零組件所有名廠都用，佢其實已悄悄做咗汽車股嘅上游。
講開工業股，的確有機會成為今年明星股板塊。唔理大市點調整，好似偉易達（303），繼續有高息因素支撐股價；仲有派咗成績表嘅ASM太平洋（522），去年純利雖倒退4%，但派息大增兼派特別股息，加加埋埋派1.6元。可以預期，去年蝕錢冇派息嘅德昌，點都派番一仙幾毫啩！
仲有隻炒味濃嘅先思行（595），炒高過後已消化楷仔同惠理基金入股嘅消息，持有嘅朋友繼續靜待突破，未有貨睇定啲至出擊。
胡孟青