每年三四月，影迷最忙！今年電影節雖縮短映期，但依舊有近240多場戲等你對號。太忙錯過了預售期？唔驚，所有場次剩餘門票明日開始公開發售，而且潮流興立體，一於來個空前36D版，事關看電影節本來就要超高清，專挑冷門好戲。埋門前，讀讀影評人的「PG指引」，還有首度於電影節公演的本地單位「貓室」作品，癲噹迷實開心死！
記者：蔡俊業
攝影：王文忠、梁細權
皮亞
原名林震宇，資深影評人及獨立電影創作人，每屆電影節慣性挑選10至15齣戲觀看。
李焯桃
資深影評人兼香港國際電影節協會藝術總監，為電影節揀片，每年看幾百齣戲實屬等閒。
土炮動畫 首現長片
小記每年看電影節都有習慣，專挑世界動畫精選來看，貪其一次過睇晒不同國家的動畫製作，今年就有阿根廷、瑞士、墨西哥等等等等，絕對「一張票睇到笑！」但論矚目，首推由創作人陳宇峰（John）等人創辦的「貓室」的作品結集《貓室動畫大集結》。以往港產動畫除麥兜，便要數阿爺級的老夫子，故今次「貓室」抬頭意義重大。還要由電影節單位主動邀請參展，John得悉後喜出望外，原因是在港播放獨立製作電影已難，更「冷門」的動畫就不用說了！「之前都試過喺波蘭播過，但香港絕對係第一次。」整齣結集「貓室」由2003至2010年製作的短片，包括熱爆YouTube，講香港打工仔辛苦命的《累透社》，還有奪獎的《鏗鏘集之隱閉老人》等；有長達20分鐘的《媽媽出世了》，也有短得只10秒的《愚人生》，當然少不得「貓室」Icon癲噹，部份屬全新創作，作為片與片之間的過場，共有6個小故事。
John回想，創作癲噹的靈感，源自兩年前街頭領養一隻流浪貓（改名姣姣），「佢好多肢體語言都好女仔，點知帶到返屋企發現多咗啲嘢，原來係男仔嚟！於是我創作呢隻貓嘅時候，就畀個百寶袋佢，但同叮噹唔同，叮噹個袋咩都有，但癲噹就只有用佢手頭上有嘅嘢去諗辦法，好現實。」過去10年香港動畫有麥兜有小克的聾貓，如今又有癲噹，「的確係越來越多人留意本土動畫，但現階段仍須努力！」
場次：2/4（18:00）藝術中心
4/4（16:00）科學館
影評人力推 十大好冷門
電影節熱門戲搶，像從未在港上映的《小雙俠》，一開售已告爆滿，可冷門片更多。影評人李焯桃既為電影節最高統帥，睇戲份屬天職，到底每年要看多少齣？「幾百套囉！去外地影展睇最多，一日睇成10套！」嘩！他澄清：「唔使套套睇晒！」相比其他專責揀片的同事，他已算「睇得少」。不屬主辦的皮亞，買飛時惟有靠手冊內的二百字簡介，準則不離導演、演員和戰績三項。阿桃還大派定心丸：「真係冷門嗰啲，推介完都唔會有人買，哈哈！」Okay，可去片！
網址： HTTP://www.hkiff.org
《小杜與我》
桃：「改編英國作家J.R.Ackerley，講原本唔愛狗嘅紳士點養狗，充滿英式幽默；而且有《仙樂飄飄處處聞》男主角ChristopherPlummer旁白，但絕非迪士尼畫工。」
場次：24/3（19:45）會展、3/4（10:30）文化中心
《尋找智美更登》
桃：「萬馬才旦係唯一拍西藏故事嘅『地上』西藏導演，單係送審已花很長時間，2008年拍完，到2009年才面世。電影探討藏族文化點樣瀕臨滅絕。」
場次：26/3（17:30）科學館、29/3（21:30）藝術中心
《戀戀耶穌》
桃：「唔係講耶穌，故事係講一個信耶穌嘅人遇上一班伊斯蘭教徒，然後引伸到兩宗教如何殊途同歸，部份情節估佢唔到。」
場次：27/3（18:00）科學館、4/4（12:30）大會堂
《牛皮貳》
桃：「上集《牛皮壹》奪亞洲數碼錄像競賽金獎，今次導演劉伽茵只用9個定鏡每次轉鏡移動都係45度Segment，而且係圍繞同一張枱；由導演本人同埋佢父母演出。」
場次：28/3（18:00）科學館、31/3（21:30）藝術中心
《香貝老師》
桃：「好少見咁非一般法國片，講婚外情好含蓄、好感動；兩位搞婚外情的主角，現實中係兩夫婦。」
場次：30/3（21:30）UA太古城、5/4（16:15）TheGrand
《感情線上腦交戰》
皮亞：「ToddSolondz嘅戲超正但知音少，太黑色幽默。尖酸諷刺社會光怪陸離，處美國市場好難得。」
場次：23/3（19:30）、27/3（18:15）及31/3（17:30）TheGrand
《中國姑娘》
皮亞：「對導演郭小櫓陌生，但齣戲攞羅迦諾電影節最佳電影，係信心保證，講流落異鄉妓女古仔，好大膽。」
場次：24/3（21:30）TheGrand、26/3（19:15）藝術中心
《愛的迫害》
皮亞：「PatriceChereau之前套《嘉比愛》我好鍾意，女主角CharlotteGainsbourg係法國潮流Icon。」
場次：30/3（17:30）TheGrand、4/4（18:00）大會堂
《春風沉醉的夜晚》
皮亞：「婁燁水準起伏大，之前套《頤和園》好難睇，但呢套戲攞咗康城影展最佳編劇，加上講同性戀開正佢嗰瓣，絕對期待！」
場次：3/4（12:30）科學館、5/4（21:00）大會堂
《白鬼》
皮亞：「ClaireDenis拍戲唔怕冷門最怕你唔識睇，佢有好多留白位畀觀眾思考，係真正嘅藝術片導演。」
場次：3/4（14:00）TheGrand、6/4（18:00）大會堂
後記：年少的癡
小事一則。大學時代看電影節非常貪心，某屆狂掃三十多齣，一位同學知道了，說兼職報館的同事想訪問我，結果見報，成為「影癡」。畢業後當上記者，可是，那份齋看場刊已夠興奮，再而花上一整天才決定買飛的日子一去不返，既因告別學生身份沒便宜飛，更重要是心境，有些癡，只年少時才懂。
新鮮熱辣，今屆奧斯卡最佳外語片《謎情追兇》都有，尚餘少量門票。
