立法會新大樓預計出年完工，唔止議員期待新大樓「青出於藍」，記者都希望日後採訪環境好過家。有電視台行家噚日參觀完新大樓記者室「示範單位」後卻大叫「有冇搞錯？」
雖然立法會厚待電視台，每個台都獨享一間工作室，但卻有苛刻規矩──規定立法會開會期間唔畀開燈兼且唔准用閃光燈，激到一眾電視台記者紮紮跳，事關黑麻麻如何做直播新聞呢？即時質問現場工作人員，大興問罪之師。
原來古怪「家規」始作俑者係一班見光死議員，兩年前通過新大樓記者室唔可以在會議進行期間開燈，原因係唔可以「閃親」同騷擾議員開會，此說令一班行家更加氣上心頭，力促議員「翻案」，撤銷惡法。