離上海世博開幕不足兩個月，有個來自內地、名為「國際健康養生論壇──世界傑出領袖養生論壇」嘅單位，攞到當中1,728平方米地方，整咗個「國際信息發展網館」，噚日喺九龍灣展貿招商，企業或個人只要捨得畀3萬蚊人仔，就可以自選攞「世界傑出領袖貢獻獎」。
唔想做「傑出領袖」，可以揀做「國際健康養生風雲人物」，名額100名，不愛獎項，呢間公司聲稱提供與「聯合國官員及政府首腦會見」機會，名額20人。呢3萬蚊人仔費用，仲包括出席館方論壇、同領導人合照等，送埋個人形象包裝，總之幫你執到正先攞獎。其他服務仲有科水1萬蚊人仔包四版特刊「報道」，落廣告由30萬元至60萬元人民幣不等，內地大款真係唔怕冇地方使錢。