華叔忽然驗出患癌，令唔少長年累月超時工作嘅政界中人擔心自己健康可能都亮起紅燈，事關從政嘅人幾乎年中無休，尤其係直選議員，隨時半夜三更都收到電話，入政壇幾年嘅公民黨陳淑莊都話頂唔順，若非有「吊命丸」續命，真係唔知捱到幾耐。
想介紹華叔 卿姐婉拒
陳淑莊所謂「吊命丸」，其實係一種赤芝丸，近年好多人服食補身，朋友推薦佢食。佢講到呢粒丸好神奇，食咗四日就見效，「如果食完覺得身體某部份痛，最好即刻去驗身，通常都係嗰部份有事。」陳淑莊冇透露食完後有冇唔妥，只係話食咗之後，成年都冇病冇痛唔使睇醫生，facial都唔使做，一樣容光煥發，好似着咗燈，喺入面透光出嚟。
正所謂病向「錢」中醫，呢粒「吊命丸」唔平o架，要成50蚊一粒，陳淑莊話佢之前友情價五折買到，所以日日食，後來要原價買，惟有隔日食。既然「吊命丸」咁神奇，陳淑莊唔介意做「補藥黨」，華叔證實患癌後，佢向民主黨副主席卿姐提起赤芝丸，建議華叔不妨試食調理身體，因為據講赤芝丸對癌症腫瘤都有效，不過卿姐話華叔已有好多藥食，心領。
護膚重防曬 嚴防曬燶
華叔家陣日日飲彝族神醫秘方冲劑，其他補藥黨都係唔好打擾佢老人家嘞。中女陳淑莊關心健康養身，話女人唔瞓好易老，所以佢盡量瞓足7小時，另外要有足夠愛情滋潤，家陣唔接官司，每星期盡量抽兩小時見男朋友。
護膚方面，日常主要用Shiseido出品，花最多工夫嘅係防曬，因為佢似吸血殭屍見光死，「我曬30秒就覺得皮膚痛。」唔曬得係落區大敵，因此陳淑莊每次出動前做足防曬，如果做運動好似跑步咁，更加要拎住支lotion一邊跑一邊搽，否則未跑完就曬燶。近排日日落雨，陳淑莊為五區公投落區宣傳唔怕曬親，前晚冷雨中派傳單，有個婆婆叫佢保重身體，即時暖晒，好過啪「吊命丸」。
mailto:[email protected]