家啲80後、90後乜嘢都話要潮、要夠型格，開口埋口都講品味，連冷冰冰嘅Netbook都話要粉紅外殼先夠味道。咁大嘅80後年輕人巿場，連日本儲存器一哥Buffalo都派出集團經理稻葉明央，飛嚟香港首次推介佢哋全新潮爆電腦周邊產品，計有花俏USB多合一讀卡器、滑鼠、耳筒、便攜揚聲器等，大玩五顏六色供香港型男索女選擇，其中重點有兩款PC用嘅仿古USB任天堂紅白機手掣，等啲80後、90後認識一吓七十年代風行一時嘅任天堂，「呢兩個仿古手掣透過USB插頭插入PC打機，古老變時興，日本都好受。
Buffalo產品花款多
Buffalo本港代理漢科電腦董事總經理Kandy話，過去Buffalo喺香港主打賣儲裝置、Router（路由器）。佢哋喺日本仲其實賣好多電腦周邊產品，今次同佢哋傾咗好耐先答應將產品引入香港，仲一口氣推出200幾款，「家啲潮人買電腦周邊產品要求多款、多顏色。」
好似港女追捧嘅閃石耳筒系列，分為四葉草、蝴蝶結、心形款式，加埋粉紅、藍等6種顏色等合共18款，總有一款啱自己嘅風格，「耳筒都變成頸鏈咁戴。」全新嘅無線或藍牙無線滑鼠都變成七彩滑鼠，其他產品仲有透明硬膠iPhone保護套，「家唔少潮人用iPhone3G，但坊間嘅保護套顧前唔顧後，今次呢個保護套連後面都保護埋。」
電郵：mailto:[email protected]