乘的士過西隧到中環，好驚在信德中心外塞車，叫司機在郵政總局外停車，再行路上天橋去中建大廈睇醫生。點知在下午四時許，過咗隧道往中區方向，啱啱見到「信德」兩個大字啫，前面啲車停晒唔行，不禁心裏一驚，乜塞成咁呀，但望清楚，右行車線空無一車，司機話似係封路喎。跟住在西環往中環方向路面，出現四架警察電單車，兩架警車，向東疾馳，司機話：「係唔係特首去完中聯辦返禮賓府呀？」唔似吖，特首應該人在北京，出席兩會啫。
警車過後，我哋跟住警車行去中環郵政總局，司機話：「人一世，物一世，今日有咁多警車為我開路，威番一次！」的士司機與交通警察乃天生敵人，彼此唔會有好說話咁，左丁山得警察在前開路之便，好快到咗中建大廈，到此大廈，十次有十次都係見醫生，冇乜第二樣。大編輯有一次到中環食飯，竟然話：「在中環做事，命都長啲！」唔係呀，中環空氣污染之極，節奏又緊張，中環人點解會長命？大編輯講：「乜唔係呀，中建大廈與萬邦行兩間大廈內，甚麼著名醫生專家、化驗檢查都有齊，有急病唔使去醫院，去中建萬邦就得！」大病都係要去醫院嘅，但急病突發病之類，在中環睇醫生，的確好方便，不過大前提就係要有銀紙，口袋裏有幾張白金卡，中環人壽命係會長啲嘅，可以救得及時吖嘛！有錢到如何鴻燊更易碰上奇蹟。
自己上到醫務所，時間啱啱好，點知即刻畀人叫住，就係十幾年前嘅M證券公司嘅亞太區總裁。總裁K現在專做上市公司獨立非執董事，唔再搏命咯，原來大家同係睇醫生H二十餘年，有乜健康事情都上來醫務所向醫生H匯報。總裁K話以前讀書時打波，可能撞親有舊患，現在老咗又重新發作，當年點解唔醫好傷患呢？總裁K話：「喂，我係五十後，小時家窮，打波撻親撞親，邊有錢睇醫生呀，靠自然治療之嘛，點似得家啲八十後有小小嘢都要自殺！」唔，好敏感嘅題目噃。
呂大樂與沈旭暉都有世代之爭，五十後vs七十後，不講為妙，解決此問題，可先由家庭開始，八十後嘅父母多數係五十後嗰代，大家在屋企有傾有講嘅話，社會爭拗一定冇咁多。