噚日三八婦女節，20幾個中港婦女由中環遮打花園遊行去政府總部，希望同唐唐對話，叫佢關顧吓中港家庭權益。遊行人士未到，已經有十個保安同職員擺晒鐵馬陣喺門口嚴陣以待，加埋警察，分分鐘一對一，有警員仲手持小型滅火筒戒備。咁大陣仗，唔知係咪因為唐唐啱啱俾人掟完鞋，所以保安升級，搞到大家咁緊張。
中港婦女為團聚請願
呢班中港婦女就話，唐唐高高在上，一直漠視中港家庭團聚嘅訴求，抵佢上星期俾人掟鞋，「我哋想攞晒屋企啲鞋嚟掟佢！」但係搵鞋掟佢都嫌嘥咗隻鞋，佢哋最後買咗一支20幾蚊嘅紅酒倒喺盤度，又將唐唐肖像製成嘅船仔，放喺紅酒上面，寓意唐唐「酒池肉林真銷魂」，希望唐唐飲靚紅酒之餘，都可以體恤吓中港家庭嘅慘況。