近期雖然有好多好戲上畫，不過大家似乎鍾意睇樓多啲，特別係一手盤，兩日成交110宗，YOHOMidtown繼續熱賣，樓市「投資風」幾乎吹至全港每個角落，元朗新樓賣5200蚊呎仲可以短炒，報章大字標題話持貨兩周賺60幾萬銀，認真和味。睇真啲，摩貨只係成咗三幾單，當中仲唔知有冇閂埋門一家親，報紙標題足以令全城動起來，邊個話報紙傳媒已死！
「投資」買樓嘅風氣就係咁越吹越行，當你身邊平時連出名驚青穩陣嘅朋友都話上咗車，你唔跟就會覺得自己好笨，有理冇理應搭番轉順風車。
呢啲朋友由未上車開始，已不停問周圍朋友買唔買好，當初意見係好壞參半，其後越嚟越多人身體力行轉軚做好友，最終呢啲朋友就係咁上咗車，仲計好數，有得賺就沽，冇得賺就自住，實冇死。呢類買家有實力當然冇問題，造七成按揭輸極有限，但年輕一輩買樓往往希望買貴啲，造足九成按揭博升值，諗住炒唔起就自住，唔該計計加埋息你仲負唔負擔得起先。
中國建築有望增派息
既然唔少朋友都係攞住鑊鏟嘅無殼蝸牛，2月摩貨就多咗35%，代埋話只佔整體二手住宅買賣1.6%，代表樓市健康喎。衰啲諗會唔會係今時今日嘅買家實力冇當年咁勁，大部份投資客都要將單位租出去幫補供樓？摩貨佔成交唔夠2%，咪即係話個市升得慢，炒家都要上會囉！
唱反調都係想大家動吓腦筋，既然地產股升咁多，建築股才剛起動，似有較大水位。樓市得定唔得，政府係咪起多啲「保障性」住房，建築商都有生意做，當然賺錢會較地產發展商少得多。
適逢下周三中國建築（3311）同亞洲水泥（743）公佈業績。中國建築今年喺中港簽咗54.1億元合同，單係河北同廣州兩單合約就近40億元，可以預期2010年將會係高增長嘅一年。以現時業務分佈，香港（60%）、內地（11%）、澳門（16%）及阿聯酋（12%），內地盈利貢獻有望大幅提高。仲有，截至去年6月底，淨現金21億元，資金壓力不大，業績若有改善，有望增加派息。
胡孟青