運輸及房屋局局長鄭汝樺早排個facebook網上論壇開得三粒鐘，俾網民狂抦。教育局政治助理楊哲安學到嘢，家喺facebook全天候同網民對話，但佢好衰唔衰，噚日喺facebook留言，問「搞對抗的人士要如何才會接受我的邀請，坐下一起溝通？」此言一出，網民梗係群起攻之，鬧佢玩抹黑歸邊。
楊政助噚日中午喺facebook展開話題，中大學生會前主席林朝暉第一個踩場：「人家不願意接受邀請，可能是未能感受到您的誠意……如約不了某位女生，總無理由認為人家『搞對抗』吧。」港大學生會前會長、學聯常委會主席郭永健加把口：「你的政治智慧與你的職位及薪酬不成對稱。雖然在香港，這是頗正常的。」
被網民窮追猛打
面對群情洶湧，楊政助仲唔知衰，反問大家唔用「搞對抗」可以用乜，例如oppositionparty。唔問由自可，一問網民繼續鬧。有人話楊政助硬係要標籤不同意見人士，「隨時轟你下台……」郭永健再發炮，反問香港有冇rulingparty，楊政助知衰話「我也同意用這詞不好。」郭窮追猛打，矛頭直指功能組別，「（香港）沒有RulingParty，但有RulingClass。」
稱以後小心用字
留言一句就中晒箭，四粒鐘就有廿幾個留言，楊政助返工時間成個晏晝覆到冇停手，仲留言做賽後總結，「lessonlearnt：說話用詞要適當，用錯改過也太遲。」仲多謝網民「提點」。
楊政助事後同八方解釋，同網民溝通係佢工作之一，逢有政策出台，無論喺office定係喺街，都會經常留意facebook，開咗account幾個月已經有300幾個「朋友」。有時佢想約持唔同意見嘅網民出嚟傾偈，但被請食檸檬，噚日先有感而發，「有人有唔同意見，我唔會唔開心，反而好開心有人留意我個facebook。」佢話以後會小心用字，又會鍥而不捨繼續約網民喎。
mailto:[email protected]