美股上周五表現不俗，助長亞洲股市昨日統統交到表現，港股亦急漲超過400點；不過大市成交唔算好勁，只得643億元，後市要再升，必需有大成交配合。
如果港交所（388）股價表現係大市成交預期指標的話，以其昨日表現似乎大家唔使愁，事關港交所公佈業績後，昨日終見回升2.9%，收報133.50元，後市有力試50日線約136.50元，若然過得到，股海氣氛又點會差？
瑞金（246）公佈全年多賺4倍至5.26億元人民幣，成績不俗，主要都係受惠金價上漲，該股昨升3%，收報10.76元。以股論股，另一金礦股紫金礦業（2899）亦有值得憧憬之處，昨升不足1%，收報6.85元，不妨留意。
紫金係內地最大儲量及產量的黃金開採企業，今年初曾發出盈喜，集團預期去年全年淨利潤按年增長逾15%。
金價呢輪企穩1100美元樓上，顯示強勢猶在，有利金礦股後市伺機炒上，紫金現價可買，獲利目標先放於7.50元至8元。
方星俠