港股突升408點，大市氣氛似乎又再開始興旺，假如部署下一轉炒作升浪，要諗諗下一浪主題是甚麼？在今年年中，先後有兩件大事，首先是上海世博，由於世博為期有數個月，所以炒作相關股份應該無咁短線，到上海概念股一哄而起時才追未遲，反而世界盃概念好快就到，亦好快就炒完，故此趁現在仍未炒到，要快手快腳儲定貨先，不論電視股、啤酒股抑或波鞋股，都要快人一步，唔係好易蝕章。
名副其實世盃概念股
永嘉集團（3322）是名副其實世盃概念股，因為賣波衫的上市公司，幾乎只此一家，但係??家仲未出現炒風。永嘉中期純利下跌一成至9266萬元，但維持派發2.5仙股息，業績報告表明下半年盈利有機會回復增長，而主席兼大股東亦作出增持，港交所資料顯示，集團主席兼大股東李國棟於去年12月初開始小量增持，反映對股價的信心，以及股價底線所在。
上半年業績倒退，其一原因是美國市場收縮，集團已在第二季終止在美國市場銷售活動服裝產品，分銷及零售收入2.85億元，減12.8%，經營虧損4740萬元，而前同期則有溢利776萬元。
集團獨家分銷Umbro產品，有158個分銷商，在大中華地區經營1400個銷售點，銷售Diadora產品有27個分銷商，經營100個銷售點；另外，在中港亦擁有100間單一及多品牌店舖。永嘉昨收1.34元，跌2.19%，炒世盃概念，家係時候儲貨。
歐陽風