80後仍然係今期流行，港大校長徐立之每日喺學校肯定見唔少，不過佢噚日喺電台自爆，話其實都唔係好了解80後，好似佢兩個80後嘅囝囝，當年大學畢業，都不約而同剃光個頭去行畢業禮，「我都唔知咁做乜嘢意思，或者係要刺激吓我，不過呢啲係佢哋嘅一種表達，我唔係話反對亦唔係認同，但就要尊重。」
徐校長話，對自己嘅學生唔同對自己個仔，一定要肯聆聽唔同方面嘅聲音，而同學所發表嘅言論只要合法，大學就一定支持佢哋自由發表，因為大學正正係社會「誇張」嘅縮影，所有突破誇張嘅新發明同研究都喺大學出現，如果連大學都唔畀講嘢，仲有邊度畀講？