樂隊Mr.前晚首次在紅館舉行演唱會，成員MJ和Tom的另一半卓韻芝和o靚模蔡穎恩（Evelyn）皆現身打氣，前輩級的譚詠麟（阿倫）也一身punk爆造型上台合唱，high爆全場。
出道日子尚短的Mr.前晚在紅館舉行一連兩場「Mr.EveryoneConcert1」演唱會，三面台幾近爆滿，成員MJ的女友卓韻芝和Tom的o靚模女友Evelyn均大方睇騷打氣，與卓韻芝同行的外籍女友人更錫了她臉頰一啖。
甫開場先由台灣模特兒楊俐思（Liz）穿性感bratop大跳蛇舞，播出五子籌備演唱會的片段後，Mr.便出場獻唱，主音Alan說：「真係好開心，有第一次紅館演唱會，我哋真係冇諗過，連想都冇想過有機會喺紅館開騷，大家要好好享受。」他們除獻唱自己的歌曲，也有選唱Beyond的《未曾後悔》、張國榮的《大熱》及陳奕迅的《演唱會》。
冇安哥Fans鼓譟
Alan先穿闊身褲，不久後換上貼身褲，但隨即又換回之前的闊身褲，他直言：「因為窄身褲太過現袋。」Dash即取笑他：「你一向都咁fashionable。」
當晚譚詠麟除了和彭健新到場看後輩演出外，他更擔任表演嘉賓，還梳了個punk爆髮型上台，跟Mr.合唱多首金曲如《暴風女神Lorelei》及《你知我知》等，阿倫雖然肚腩凸凸，但中氣十足。
身為band友始祖的阿倫說：「夾band真係好窮，之前聽Ronny講話睇醫生都冇錢，只係飲水同焗汗算，但夾band真係好好玩。」當阿倫在台下睇騷時，多次舉起和平手勢和大聲歡呼，表現瘋狂。
LMF也擔任嘉賓，他們唱出乾淨版《揸緊中指》及《大懶堂》，但阿肥等人也有舉起中指搞氣氛。由於當晚未有安哥，導致部份觀眾一度鼓譟。
事後問Mr.為何沒安哥？Dash說：「我哋都唔夠歌，其實外國好多band騷都係11點左右完，但我哋會再研究吓。」提到女友到場支持，MJ說：「佢（卓韻芝）出書喺香港有簽名會，佢返嚟一半為書一半為我。」Tom則說：「佢有電影上，總之恭喜佢多謝佢。」
採訪：何慧斯
攝影：陳慧安
