俗語有云，禍不單行。好似英超榜尾嘅樸茨茅夫（圖）咁，上月已因財困被接管，俾英足總扣咗9分，幾乎篤定降班；以為上周六喺英足盃8強2:0贏伯明翰後，約81萬鎊嘅獎金（包括晉級獎金、門票收入、電視轉播）會袋袋平安啦！點知英足總話根據條例，被接管嘅球隊未必攞到呢筆錢；財困嘅樸茅等錢救命，所以準備寫信去英足總請求網開一面，英足總就話要樸茅最好寫得清清楚楚，點解要畀番筆錢佢哋。如果樸茅攞唔番呢筆錢，容乜易之後嘅英足盃賽事會放軟手腳o架？