中澤佑二嘅橫濱水手新隊友中村俊輔係廣告寵兒，而呢位日本國家隊隊長亦係公認嘅CM王，憑住健康形象兼且型過「犀利哥」而得到廣告商嘅青睞，啱啱就做咗郵貯銀行嘅代言人。
喺日本，唔少日聯嘅人氣球員都會被明星化，中澤佑二就係其中之一；呢位外號「炸彈人」、效力橫濱水手嘅32歲中堅，99年出道至今，喺日本球壇一直企穩喺一線位，加上外形拍得住近期熱爆嘅「犀利哥」，所以深受球迷歡迎。
同中村俊輔拍住上
之前日本漫畫《足球之夢》作者?內夏子就用咗中澤佑二做主角，畫咗套短篇足球漫畫《中澤佑二物語》。先排佢仲俾郵貯銀行睇中，搵咗佢做代言人；而佢除咗執到靚靚、全副老西拍攝硬照之外，仲喺30秒嘅廣告短片內大展身手，展示其驚人嘅彈跳力同埋厲害嘅頂上功夫。
除咗拍廣告，中澤佑二最近仲拍埋MV，客串演出日本人氣組合Sambomaster嘅汽車廣告歌《你從未做過》；而由於佢有唔少演出經驗，所以一啲都難唔倒佢，話咁快做到導演要求。話時話，中澤佑二嘅水手新隊友中村俊輔，舊年亦喺Hi-FiCAMP嘅健康飲品廣告歌《一顆大淚珠》友情演出。
新一季日聯，中澤佑二同中村俊輔合力打江山，主宰水手攻與守；唔知步出球場後，佢哋有冇機會一齊拍廣告或者MV呢？
中澤佑二小檔案
YujiNAKAZAWA
出生日期：25/02/78（32歲）
國籍：日本
身高：1米87
位置：後衞
現效球會：橫濱水手（日聯）
官網： http://www.bomber22.com