煲呔前家丁阿雄早前帶同親友去禮賓府BBQ，深入特首起居生活嘅每個角落，恨死唔少網民，有人仲喺facebook建議將禮賓府改做燒烤樂園。唔知係咪大家見禮賓府原來咁好玩，噚日禮賓府開放畀市民入去賞花，雖然成日落住毛毛雨，都吸引到成12,000人去參觀、影相、示威抗議，齊齊用自己方法「活化」禮賓府。
傳80後踩場 便衣戒備
禮賓府早上10點開放，一批雷曼苦主最先入場。佢哋最初無聲無息，大約50人行到入去花園小徑，就齊齊展示人肉標語，每人手持一個字，抄襲陳巧文、周諾恆等80後早前惡搞禮賓府嘅行動，玩砌字影大合照作無聲抗議。苦主砌咗「曾蔭權下台」、「雷曼未解決」、「要求司法覆核」等字句拍照留念。警察相當緊張，便衣即刻上前監視，一見佢哋叫口號就立刻勸阻。
現場落住雨，路又窄，有市民叫班苦主想追錢應該去銀行，有人就認為入嚟抗議冇乜所謂。雷曼苦主先後喺三個地方砌字影相，大約45分鐘後和平散去。不過，班警察仲未可以回氣，因為盛傳80後示威者會喺12點半到場示威，班阿sir夠鐘都唔敢去食晏。大批軍裝同便衣企喺門口戒備，點知班80後冇出現。一場嚟到，班便衣人都唔知做乜好。
煲呔前家丁同親友可以深入禮賓府大影特影，一般市民就梗係冇咁幸福。前家丁當日安排朋友去貴賓廳扮授勳，又可以喺國家前主席江澤民嘅題字前留影，去埋錦鯉池賞錦鯉都仲得，但噚日開放日，一般市民只可以隔住圍欄遠望客廳，現場有保安人員把守，錦鯉池就更加冇開放。
唔知係咪驚市民投訴煲呔親疏有別，禮賓府年年開放畀市民賞花，今年就有新措施，安排咗批導賞員向參觀者介紹禮賓府內一草一木，又有資料簡介禮賓府歷史。市民除咗可以賞花，政府仲安排咗特首專用嘅電動車同房車畀市民參觀。其實，當局可以考慮順應民意，第日標示埋個BBQ位置，等大家多個景點拍攝。
mailto:[email protected]