華華間唔中會聽見祖國啲官員，因為經濟犯罪而俾人拉咗，點解咁多官都衰呢一瓣？唔通因為佢哋人工低？工業和信息化部部長李毅中，就係一個活生生嘅例子。
李部長之前上咗中央人民廣播電台嘅節目「做客中央台」，驚爆自己舊年嘅人工只係得14萬人民幣！無錯，只係得14萬，華華並唔係寫少咗個「0」o架！
搞石油石化出身嘅李部長話，呢幾年石化企業老總年薪過百萬，並唔係乜嘢新鮮嘅事。華華查過，依家中石化嘅執董年薪都有成80萬。
3G推動者 用2G手機
李部長話，佢03年離開中石化個陣，國資委要組班，一年嘅人工係14萬，佢就揀調去國資委，「一下就是每個月五六千塊，所以當時有句說話，就是我眼看就要先富起來」，但無諗過，又跌落貧困深淵，舊年埋單計，佢全年人工仍然只係14萬，真係不無欷歔！
除咗爆自己係「廉價勞工」外，有份為國家策劃同推動3G前進嘅李毅中，原來佢自己仲用緊2G手機！65歲嘅佢解釋，自己家個手機好好用唔捨得換，但佢仍然希望廣大消費者要熟悉3G、運用3G！連李部長都唔身先士卒，好似欠缺咗啲說股力喎！
承達倫哥 要將Golf場升呢
祖國高官自爆人工低，上市企業執董年薪都贏佢幾條街，所以對於承達（2288）主席陳偉倫嚟講，有錢梗係搞啲高檔嘢。近幾年，高爾夫球呢樣運動日漸平民化，搞西灣河IslandGolf起朵嘅倫哥，據聞為咗將Golf「升呢」，回復返去以前咁高尚，諗住將將軍澳個新場加價，收番貴啲，提升返啲客戶嘅質素。
送咗批會員卡俾TVB
倫哥點解會的起心肝想搞好返個場？事關佢成日見到場內，男嘅就牛記笠記，女嘅着鬆高鞋都夠膽死。就算唔計高球禮儀呀，一個唔覺意整件鬆糕女，喺上層drivingrange（練習場）「kick親」撻落樓下都弊傢伙啦！
講開呢個新場，據聞送咗批會員卡俾TVB（即係華華係堆填區做嘢嘅鄰居），唔知遲啲會唔會變成另一個追星熱點呢？
歐洲「搵食」 陶冬亂噏出事
瑞信亞洲區首席經濟分析師陶冬嘅個人blog，華華成日都去一。呢排佢變左「空中飛人」，一個禮拜飛足9個歐洲城市，每日平均有7個會議。去到行程最尾，仲有個半鐘先要去機場，佢諗住鬆一鬆，去咗間蘇黎世著名嘅西班牙餐廳，叫咗海鮮同美酒，仲同waiter講要趕上機，啲菜嚟得越快越好。嗰waiter幾乎唔識講英文，但好誠懇話「si，si」，過咗20分鐘，陶冬叫佢「quick！quick！」，服務員回應「si，si」。跟住每隔20分鐘，陶冬再催，服務員都係話「si，si」。
叫waiter快啲 誤以為等埋朋友
之後輪到個waiter搵陶冬，手指廚房，講咗一堆西班牙話，做咗個「要快，要快」嘅面情，輪到陶冬同佢講「si，si」。佢環顧四周，見餐廳裏面嘅客人都好悠閒，佢唔想丟中國人嘅面，惟有㩒住自己焦急嘅心情。點知再過20分鐘，個waiter搵咗個識講英文嘅幫手，問陶冬「個朋友幾時到？」呢個時候，陶冬先知人地誤會咗佢等朋友，啲菜整好咗好耐，都唔敢攞出嚟。終果陶冬用15分鐘嘅極速食完啲餸就即刻趕去機場。
陶冬喺個blog度話，呢個故事教訓佢，喺歐洲食飯一定要講清楚，千祈唔好唔知就扮知講「si，si」。
