在《讀者文摘》港人信任排名榜位列尾四嘅特首煲呔，終於得到平反，香港遊樂場協會噚日公佈香港青少年眼中傑出人士調查結果，發現受訪約1,200個11歲至17歲青少年中，四成七認為「政治家」煲呔係最傑出政治人物，相信佢都老懷安慰，兩個司長鬍鬚曾、唐公子分列第三、四位，位居傑出政治人物第二位嘅，正是長毛！
港台有份策劃
呢個調查好兒戲？雖然係由遊樂場協會做，大家唔好以為玩嘢呀，調查上個月進行，香港電台有份策劃，即係獲政府部門認可，即使只係訪問細路哥，不過結果絕對唔係小兒科，同被曾鈺成質疑公信力嘅《讀者文摘》做嘅調查不可同日而語。八方有言在先，如果大家質疑調查數據，對長毛傑出地位有疑問，即係挑戰煲呔，隨時大罪過公投起義。
協會指調查同時發現，青少年認為傑出人士最重要係有良好品德同尊重他人，即係煲呔同長毛都咁有品，至於兩個司長，根據邏輯，即係冇咁有品囉，唔怪得俾人掟鞋，鬍鬚曾下次出街，睇路喎。調查同時叫青少年講吓覺得邊個商人最傑出，七成半人捧首富李超人，其次係徐子淇老公李家誠，第三位先至輪到佢伯爺四叔，而緊隨四叔排第四位嘅，竟然係風水師哨牙通，小小超慘屈居第五位，任志剛、賭王、六叔同已故小甜甜，通通都不及哨牙通，簡直係望塵莫及。
認為風水師係傑出人士，與富商齊名，而靠父蔭嘅富豪第二代，竟然仲傑出過赤手空拳打江山嘅老竇，香港青少年果然都十分傑出。點解長毛會當選傑出人士呢？八方參考遊樂場協會解釋，指青少年心目中嘅傑出人士，未必一定係高不可攀嘅權貴，最重要係願意同青少年接觸、溝通，就有機會成為青少年眼中傑出人士，而今次調查亦發現，一啲經常喺青少年身邊出現嘅老師、社工都榜上有名，佢哋可能名不見經傳，但往往會喺青少年成長中起很大正面作用。
mailto:[email protected]
青少年認為最傑出政治人物
排名1 姓名：曾蔭權 百分比：47.4%
排名2 姓名：梁國雄 百分比：13.2%
排名3 姓名：曾俊華 百分比：6.9%
排名4 姓名：唐英年 百分比： 5.4%
排名5 姓名：董建華 百分比：3.0%
排名6 姓名：陳方安生 百分比：2.8%
排名7 姓名：陳馮富珍 百分比：2.1%
排名8 姓名：黃毓民 百分比：2.1%
排名9 姓名：司徒華 百分比：2.0%
排名10 姓名：范徐麗泰 百分比：1.7%
資料來源：香港遊樂場協會