無綫《星期二檔案》嘅《中女告白》搞到全城男女熱烈討論，犀利哥嘅不羈風采就深深烙喺我哋女士心中。其實既然香港咁多寂寞芳心，而內地就連流浪漢都咁英，點解我哋唔可以學吓班港男，北望神州。
諗住飛去寧波一睹犀利哥嘅「塵」世美，點知發現回鄉卡啱啱過期，惟有睇《蘋果》直擊止渴。中旅社董事副總經理姚思榮對小妹講，呢大半年中旅社日日逼滿換回鄉卡市民，因為回鄉卡99年開始採用，10年期嘅證件舊年起開始到期。
中旅社話唔使擔心，因為有幾間全新嘅「證件服務中心」會陸續運作，專門為換回鄉卡而設，唔做旅行團等等；其中3月8日星期一開幕、喺牛頭角海濱道九倉電訊廣場嘅中心，佔地9,000呎，每日可以服務過千人，加快輪候時間。沙田瀝源街7號娛樂城嘅中心就3月29號開幕，之後港島東區都有，今年第二季運作。
部份中旅社分社都會辦換證，可以上網預約（ http://www.ctshk.com/passport/bookrep.htm），但小妹見到好多近半個月都滿咗。唔使擔心，因為現場會派當日籌，額滿即止。10年期成人卡、3年期兒童卡，收費為 $390同$260，12個工作天後攞證，快證只需要5個工作天，但加收$200。
電郵：mailto:[email protected]