一片空白。
不要問我為甚麼這一篇要起個這樣的題目，總之在瑞典2月的雪地上，跣呀跣、走呀走（去緊shopping），一片空白的腦海裏只浮起兩句對白，第一句我決定拿回去做題目──「別在雪地上奔跑」冇得解嘅！第二句當然是──「妖，點解行咁X耐都未到，想凍Q死人咩？」
其實與人無尤，年年過年勁怕凍的我，都專登揀個勁凍的地方去，有苦衷的，只因為年年買得太多厚衫，香港太熱冇機會着太大嘥，惟有用機票來延長自己的冬天。卒之搞到家……
唉，一片空白。
對着Stockholm厚厚的雪，彷彿全個城市都鋪了一層思樂冰，除了第一眼「嘩落雪呀！」開心了三秒，第四秒已經見悶，腦裏無端端冒出的除了「別在雪地上奔跑」這句無頭無尾的「新詩」之外，你知唔知我竟然悶到為這個城市搵主題曲，你估係邊首？
是溫拿樂隊的《ShaLaLaLaLa》。
點解？
你試吓將呢個城市名填上去chorus第一句ShaLaLaLaLa嗰度唱：
「遊埠去，斯德歌爾摩（拍手3下）」
真係無聊，只因一片空白。
H&M之城
我說「一片空白」，你說「鋪滿了雪」，雪不是東西嗎？
我說Stockholm是個「冇乜衫賣」的城市，你問我「H&M不是時裝嗎？」
「五步一樓十步一閣」是個很少用的講法，因為真正能符合這種瘋狂景象的情況好少，在香港，大概只有80年代的銀行和現在的便利店能「無負」這個「美譽」吧？
但在斯德歌爾摩的H&M，「五步一樓十步一閣」我嫌客氣，你看這張購物旺區的風景照（見附圖），自問眼利的朋友請數數全條街有幾多個H&M招牌？
3個，我不怕告訴你我現場看到這畫面嚇一嚇想掉頭走，誰知一轉身後面是間更大的H&M，鬼古嗎？
講明先，我係鍾意H&Mo架吓，但凡「收你一個中中哋嘅價錢，而搞到啲市民幾fashionable」嘅牌子都得到我的尊敬，將國人打扮平均分拉高是項德政。但之前我說在斯德歌爾摩冇乜其他名牌時裝可買，大概也關H&M事。H&M已經那麼平那麼潮，誰還要買LV、Hermès和Chanel呢？於是H&M以外的幾乎所有東西都被「自然淘汰」了，正所謂「有辣有唔辣」，Stockholm的fashionscene變了現在的樣子，正是「成也H&M敗也H&M」。
如果畀我揀，我都唔知我情願我嘅hometown係咁定唔係咁好。
心理學上有種叫「StockholmSyndrome」的案例，指肉參被綁匪囚禁久了而日久生出好感與同情，我想如果時裝上也有「斯德歌爾摩症候群」的話，大概就是形容對H&M的難捨難離吧。
和H&M上床
仍是H&M。
是不是在全世界買到的H&M都一樣呢？
來到她的主場有沒有特別的treatment呢？
有喎，原來！
今次在瑞典買得我最開心的是H&MHomeCollection，即是這個時裝帝國去年始生產的家品系列，據說只得瑞典和挪威有得賣，我買了一set豹紋被套枕頭袋，雖不是幾多針幾多針的EgyptianCotton，所以有少少「肉」，但KingSize都只賣四百幾港幣，真係開心當跌咗都抵啦。
寂寞才做牛仔褲
對，我是有「寂寞才做牛仔褲」這個理論的，在冇乜娛樂的城市，市民才有心情去「撚」牛仔褲這麼花時間的東西吧。
北歐自然符合上述條件，所以去Stockholm，幾冇嘢可買都好，仍有AcneJeans，去Norrmalmstorg2的旗艦店走一轉吧，你會像我一樣得到3個開心大發現：
1.價錢比香港便宜起碼30%。
2.原來他們已不只出牛仔褲，女裝方面還有些很fashion的嘗試，唔錯的。
3.他們原來出品了內衣內褲（圖），素來喜歡AcneJeansT恤的「滑一滑」，hmm~
覺悟
在瑞典行公司，常見「REA」字樣的標貼，有時是「Realisation」，看真原來才知是瑞典文的「大減價」，即「套現」之意，但字面同時可解作覺悟，啊，在大減價中覺悟，真有哲學味。真係要送番首陳奕迅的《陀飛輪》你聽至得！（Realisation在瑞典語和德語都是同義）
八卦皇后
瑞典有幾悶？仲問？
OK，可以舉這麼一個例。那天我在斯德歌爾摩逛書店，見一似足英國《Hello》類八卦雜誌的刊物，叫《Queen》，封面就是大大個瑞典皇后Silvia，揭開一看，全是皇后的每日星蹤，對，居然有本圖文並茂專門八卦皇后日常生活的八卦雜誌。你說瑞典是悶亦得，是精采都得喎！
但你問我Stockholm是不是一定悶死人，我會說，三日兩夜頂籠四日三夜是OK的。經過附近到此一遊即可，專登去可能會同團友或家人嗌交。
最妖異「蘇分呢牙」
家人臨離開瑞典在機場騰來騰去，無他，人之常情，你同我都一定試過──想「搞掂」埋啲碎銀先上機，尤其是這個未必咁快翻尋味的城市，keep一「乍」克羅又冇乜用，買晒souvenir最好。結果佢消失了15分鐘，回來時多了一塊馴鹿皮（圖），係，你冇眼花，係馴鹿層皮嗰個「馴鹿皮」。
「好平咩？」我問。「用碎銀買到咩？」
佢話八百幾克朗，結果餘額要碌卡，「但好過買4盒朱古力吖嘛」佢又話，「Bytheway，送畀你嘅！」
結果我屋企無端端多了塊「馴鹿皮」。
大概是我嫌Stockholm冇嘢買，Stockholm小器，復仇了。
呢勻真係「收皮」。
本周抗議
與本文無關，但忍不住要講，而且要家講。
強烈反對有關當局的拯救犀利哥行動，原本無比有趣的街頭stylist，現在變了無特色普通人一個，安樂啦！人哋犀利哥幾時有話過你聽瞓街唔happy啫？
你們這班人自以為「救人」，「救死了人」你有沒有聽過？犀利哥就是給你們救死了。
Textby黃偉文
mailto:[email protected]
本欄逢星期日刊出
