Accord一直係本田王牌房車車款，推出咗第八代後，去年再玩小改款，今次呢款LX版，就再玩「瘦身」，省卻天窗及側鏡指揮燈，目的就梗係幫你慳啦！平差唔多四萬，而作為招牌豪房嘅其他豪華配備完全無少，依然拍得住歐洲車級數，令一個「抵」字，更有份量。
記者：趙慧敏
攝影：陳陶鈞
Model：Joanne
老細級大隻佬
所謂女大十八變，Accord嘅變身都算驚人，由「年輕」時嘅跑房格慢慢走向今日成熟嘅豪房Look，不過唔好以為要做豪房就一定走斯文路線，偏偏Accord就要操成大隻佬，全身條線剛勁有力，但又保持豪華房車格局，無論你將佢當成老闆車，又或者家庭車，總會滿足到你要求。
舊年AccordEX版先登陸，將原來的第八代進行小改款，增加車身肌肉感，將原來平實的日本房車改頭換面變成充滿歐洲味的豪華房車，車頭冚兩邊加有剛直的骨位線條，同電鍍鬼面罩連成一體，配合低斜修長頭燈設計，原來豪房都可以惡形惡相得來而毫不突兀，加上門邊扶手，尾燈組合都用上大量電鍍裝飾，實行閃到你暈。今次再推出LX版就轉玩精簡，不過唔好以為AccordLX係「瘦身」版就乜都慳得就慳，其實基本設備與EX版相若，只係天窗同側鏡指揮燈欠奉，胎軨細了1吋。唔係特別鍾意曬月光嘅車主，可能舉腳贊成，因為車價比EX版（$316,880起）平足$39,000，最重要嘅係老闆級豪華感絲毫不減。
豪住嚟劈
買得豪房，內櫳級數重於一切，由打開AccordLX車門一刻開始，已即時感受到舒適寬敞嘅氣派，皺紋皮剪裁嘅真皮座椅，令人有撲上去嘅衝動。以Accord這款中型豪房級數，搵司機揸不如親身駕馭，駕駛座要求高啲梗合理，LX保留雙電動座椅設計，駕駛席更設有2方向腰靠調節，你想點承托都無問題。至於中央顯示屏，後泊車顯示鏡頭當然唔少得。
如果望見Accord豪氣逼人，就以為佢睇得唔劈得，咁你就大錯特錯，因為佢嘅2.4公升i-VTEC環保引擎，就可以爆發出180匹馬力。馬力增加，但耗油量就較上一代減少10.2%，加上五前速機智邏輯自動變速系統，令轉檔反應更利落。咁大架靚車擺喺眼前，唔走番轉似乎對唔住自己，實行司機同乘客都做吓。甫上駕駛座，舒適感首先攞分，揸上手，雖然感覺車身頗為巨型，但靈活感亦很突出，尤其係D2至D3多次轉檔，反應甚快，由低波轉向高波時，即時加速，反應之快令人驚喜。
規格
引擎：2,354cc直四i-VTEC
馬力：180ps/6,500rpm
扭力：22.6kg-m/4,300rpm
傳動：五前速機智邏輯自動變速系統
售價：$277,880起
查詢：合群汽車（28278622）